2014 奈良馬拉松 72 小時之旅 Day 3

用先到先得的報名方法，仲要海外選手都無咩優惠，報名日唯有座定定等開始啦。好彩佢地係夜晚放工回家後時段先開始，可以安心等報名！終於黎到六個月後的今日喇，清早起來，天還未亮，望著窗外，望望手機天氣：1°C。OMG ©©!

離開酒店，寒風刺骨，都係趕快去 JR 巴士站搭接駁巴士去球場起點。

人頭湧湧，趕忙揾個地方換衫。第一次要著便利雨衣等起跑。今次報自己5小時完走，企係J 區，個太陽又唔見左，真係要跳下跳下保暖先得。終於等到9:00 , 條隊開始郁喇，不過要去到起點係要 9 分鐘既。

 

 

 開頭係落斜，但由於路窄人多，pacing 都係 7 min /k. 不過好快就轉落近鐵奈良站的大街，終於可以加速喇。6k 就有聖誕靚女補給朱古力，太好了。

  

見到人小小排隊，決定先去放下水先。開揚密封任君選擇。當密封廁格有位，難得男跑手會好有禮讓俾女跑手去先。心想日本男士幾時咁有風度哩？大會仲有消毒藥水俾大家洗手。

 

去到春日大社，其實係我地睇主d 鹿跑，還是係 d 鹿睇主我地跑哩？離開春日大社，開始跑入民居，小朋友，大朋友，老人家都係路旁為你打氣，沿途同佢地一路擊掌，輕輕鬆鬆地完成15k。

奈良可能係鄉郊比賽, 所有補給站後都有好多垃圾袋(有d 仲有義工拎住) 俾跑手放低 d 紙杯 , 基本上真係無人會亂咁放, 大家都可以好放心跑而唔洗要避開 d 垃圾.

離開民居，開始向天理進發，賽道好似大美督半馬條路咁，有上有落，不過整體都係以落為主，睇見回程跑手上斜，真係唔咁諗自己一陣會點死。

12 月的奈良，景色真係好靚，樹葉有不同的顏色，綠，淺綠，黃，紅 樣樣都有，靚到飛起。可惜全日都無太陽，影出黎d 相點都爭小小。沿途雖然係郊區，但打氣團一路無缺，贊！！

到左天理，兜完幾個圈，終於黎到 25k 天理教總部的補給站，究竟有咩食哩？ 哇。係熱辣辣紅豆沙+幾粒脆卜卜，實在太好味喇！一不離二，再來一碗，食完成個人暖曬。再起跑人都精神d。

25k-30k 係連綿不絕的上山，唯有減速睚上去。

不過，大會安排得好好，27k 又有補給，今次係豬肉湯飯，真係有隻豬招呼你，一杯有一舊壽司 size 的飯團，美味到極！！ 連食三杯！！

咦，發現左5小時 pacer, 步速好啱下woor, 跟實你先。雖然無同自己訂咩目標，但點都唔想 好似廣洲馬咁樣over 5小時完賽，一於跟實你！

31k 左右，又黎補給！！？？
入唔入哩？5小時 pacer 唔入 woor, 咁我....................................................... 入啦！今次係冷米線，凍野一碗就夠喇，拿拿臨離開，不過個pacer 已經唔見左 lu!

當你食完飯，麵，糖水後，一個set lunch 仲爭d 咩哩？ 無錯，係飯後果。地道甜柑，真係企係到等佢剝皮都抵！

甜柑過後，印象中的補給站都食完曬，飽到原本30k 要食個包 gel 都慳番。係時候要keep 返個 pacing ,望望手錶，仲 keep到 6分幾pacing, 寒冷天氣 + 強勁補給真係好幫到手。雖然唔見左個 5小時 pacer, 但 sub 5 看黎都仲有機！

大會其實仲有一個好好的安排, 就係可以係網上即時 check 到各跑手的大慨位置及分段時間, 方便到場親友預計時間等待跑手出現為他們打氣. 所以我遠在 hk 的老婆都知我跑成點, 無得呃 !! 當老婆見到我25-30k 慢左咁多, 仲以為發生咩事添, 其實係食野食耐左姐, 哈哈...!!

最尾6-7k, 可能太凍，mp3已經無電， 手機d 電用到差唔多，唔敢再亂影喇，唯有專心一意向 sub 5 進發。最後 4k, 竟然仲有最後一個補給，係咖啡！！太令人感動，一杯溫暖咖啡為奈良全馬補給 set lunch畫上一個完美句號，飲完真係成個人醒曬。

返到最後1k 上斜衝返去終點，大會真係安排得太好喇，成個攝影師影主你衝上去，為左張靚相，迫主你唔可以行，點都要咬緊牙關跑上去。

入到球場喇，仲有前奧運日本馬拉松銀牌(1992)+銅牌(1996)得主有森裕子係到幫大家擊掌打氣添。

最後100m , sub5 成功，4:59:27, yeah !!

一過終點，幾架輪椅等住有需要人士，好彩我唔洗用。

 完成獎牌，毛巾，帶草帽影相，拎行李，哩 d 都係指定動作。但大會仲有即時打印証書，哩個真係好正，唔洗返屋企等寄黎，對於大會都慳番 唔小人力+資源。

慢慢行返去 jr 站 酒店浸埋溫泉，食埋飯，搭巴士去機場搭夜機返hk. 完美結束72 小時旅程。

最後仲有官方 video 俾我回味, 正 式!!

下一站會跑咩?? 未就係雞肋 ==> 渣馬囉 !!

<<DAY 1>>

<<DAY 2 >>

<< DAY 3>>